ދިވެހި ރާއްޖެ ސިޔާސީގޮތުން މިނިވަންވިތާ 46 ވަނަ މުނާސަބަތު ފާހަގަކުރަމުންދާއިރު، މިނިވަންކަމަކުގެ ހަގީގީ މާނައަކީ ކޮބައިތޯ ބަލައިލަން އެބަޖެހެއެވެ. އަޅުގަނޑުމެންގެ މިރާއްޖެއަކީ މުސްލިމުންކަމަށް ވީހިނދު، އަޅުގަނޑުމެން މިނިވަންކަން މާނަކުރަންވާނީ އެންމެހާ މަޚްލޫޤުންގެ އަޅުވެތިކަމުން ސަލާމަތްކޮށް މާތްﷲ ތަބާރަކަ ވަތަޢަލާގެ އަޅުވެތިކަމަށް އައުމެވެ. އެހެންކަމުން މިއުންމަތަށް މިނިވަންކަން ގެނައުމުގެ މަސައްކަތް ފެށުނީ މީގެ 1432 އަހަރު ކުރިން އިސްލާމްދީނުގެ ނޫރު ފެތުރެން ފެށުނު ހިސާބުންނެވެ. ދެން އަޅުގަނޑުމެންގެ މިޝަރަފުވެރި ފަސްގަނޑަށް މިނިވަންކަން ލިބުނީ ކޮން އަހަރަކުތޯ ބަލައިފިނަމަ އަޅުގަނޑަށް ޖަވާބުގައި ދެވޭނީ ރާއްޖެ އިސްލާމްވީ ދުވަހުކަމަށެވެ. އެހެނީ އެދުވަހަކީ އިންސާނުގެ އަޅުވެތިކަމުން ދިވެހި ރާއްޖޭގެ ރައްޔިތުން ﷲ އަޅުވެތިކަމަށް ގެނާ ދުވަސްކަމަށްވުމެވެ.
