ފަތުރުވެރިކަން ހއ. އަތޮޅަށް ތަޢާރަފް ވުމުގެ ސަބަބުން އިހަވަންދޫއަށް އެއްވެސް ފައިދާއެއް ކުރޭ ހެއްޔެވެ؟

ފަތުރުވެރިކަމުގެ ދާއިރާއިން ދުނިޔޭގެ އެންމެ ނަން މައްޝޫރު އެއްޤައުމަކީ ދިވެހިރާއްޖެއެވެ. ކުދިކުދި ޖަޒީރާ ރަށްތަކުގެ މައްޗަށް ހިންދޫކަނޑުގައި އުފެދިފައިވާ ދިވެހި ރާއްޖެއަށް ފަތުރުވެރިން އަންނަނީ އެޖަޒީރާ ރަށްތަކުގެ ޤުދުރަތީ މަންޒަރުތައް ބަލާލުމަށެވެ. ކަނޑުއަޑީގެ ޤުދުރަތީ ފިލްމުތައް ބަލައި ލުމަށެވެ. ނަތީޖާއެއްގެ ގޮތުން، ދިވެހި ގަޢުމު ގެ އިޤްތިޞާދުގެ ބޮޑުބައެއް މިހާރު އަދާކުރަމުންދަނީ ފަތުރުވެރިކަމެވެ. އެގޮތުން ފަތުރުވެރިކަން މިހާރުވަނީ ރާއްޖޭގެ އެކި ކަންކޮޅުތަކަށް ފެތުރެންފަށާފައެވެ.

އާދެ އެންމެފަހުން ފަތުރުވެރިކަން ތިލަދުންމަތީ އުތުރު ބުރީގައިވެސް ކުރަންފެށައިފިއެވެ. އަދި އޭގެ ބޭނުން އިހަވަންދޫގެ ރައްޔިތުންވެސް ދަނީ ކުރަމުންނެވެ. އަތޮޅުގައި ތިބެގެން ވަޒީފާ އަދާކުރުމުގެ ފުރުޞަތު އިހަވަންދޫގެ ރައްޔިތުންނަށްވެސް ލިބިއްޖެއެވެ. އެހެންނަމަވެސް ސުވާލަކީ، ފަތުރުވެރިކަން ހއ. އަތޮޅަށް ތަޢާރަފްވެގެން އިހަވަންދުއަށް އެއިން އެއްވެސް ފައިދާއެއް ކުރޭހެއްޔެވެ؟ ނުވަތަ ކުރާނެ ހެއްޔެވެ؟ ނޫނީ އެމީހުންގެ އުފެއްދުން ތެރިކަން އިތުރުވިކަން ފާހަގަ ކުރެވޭ ހެއްޔެވެ؟ އާދޭހެވެ. ނޭނގިނަމަވެސް ފަތުރުވެރިކަމުގެ މަންފާ ހުރިހާ ގޮތަކުންވެސް އިހަވަންދޫއަށް ކުރަމުން އެބަދެއެވެ. އަދި މަންފާ ލިބިގަނެވޭނެ އިތުރުގޮތްތަށްވެސް އެބަހުއްޓެވެ.

މިސާލެއް ނަގަމާ ހިނގާށެވެ. ރޯނުވެށުމާއި ފަންގިވުނުން މީ ވަރަށް ޤަދީމީ ޒަމާނުން ސުރެ، އިހަވަންދޫގައިވެސް ކުރަމުން ދިޔަ މަސައްކަތެކެވެ. މި މަސައްކަތަށް ލިބޭ މަންފާ އިތުރުވީ ވޭތުވެދިޔަ ދެތިން އަހަރު ދުވަހުގެ ތެރޭގައެވެ. ވަކިން ހާއްޞަކޮށް ފަންގިވިނުމުގެ މަސައްކަތް ކުރާމީހުން އިތުރުވިކަން ފާހަގަ ކުރެވެއެވެ. މިހާރު އިހަވަންދޫގެ ކުދިބޮޑު އެންމެ ކުރާ އެއްމަސައްކަތަކަށް ފަންގިވިނުންވާނެކަން ކަށަވަރެވެ. އަދި ރޯނުވަށާމީހުން އިތުރުވެ އެމަސައްކަތުގައިވެސް ފޯރިގަދަވީވެސް، މިއަތޮޅަށް ފަތުރުވެރިކަން ތަޢާރަފް ވުމާއި ގުޅިގެން އެމީހުން ކުރާ މަސައްކަތް މާކެޓުކުރެވެން ފެށީމައެވެ. އެހެންކަމުން އިހަވަންދޫގެ އުފެއްދުންތެރިކަން އިތުރުވެގެންދާނެކަން ޔަޤީނެވެ.

އަދި އަޅުގަނޑުމެންނަށް މިވަރުން ފުއްދާލެވޭކަށްނެތެވެ. އަތާ އަނގަޔާ ދިމާނުވެ، ދިރިއުޅުމުގެ ޚަރަދު އެތައްގުނައަކަށް އަރާގެން މިދާ ދަނޑިވަޅުގައި، އަޅުގަނޑުމެންނަށް ލިބިފައިވާ ފުރުޞަތުތަކުގެ ބޭނުން ހިފުމަކީ ނުހަނު ބޭނުންތެރިކަމެކެވެ. އެގޮތުން ކުރެވިދާނެ ކަންކަމުގެ ތެރޭގައި، ފަތުރުވެރިންނަށް އިހަވަންދޫ މާރކެޓްކޮށް ފަތުރުވެރިންނަށް ހާއްޞަ ވިޔަފާރިތައް ފެށުން ފާހަގަކޮށްލެވެއެވެ. މިކަމަކީ އިހަވަންދޫގެ އުފެއްދުންތެރިކަމުގެ ރޭޓު އިތުރުވެ، އިޤްތިޞާދު ރަނގަޅުކުރެވިދާނެ ކަމެކެވެ. އެހެންނަމަވެސް، މިކަންކުރުމުގައިވެސް ވިސްނާލަންޖެހޭ ކަންތައްތަކެއް ހުންނާނެވެ.

މީގެ އިތުރުން، ފަރުމަސްވެރިކަން ކޮށްގެން ފައިދާ ލިބިގަނެވިދާނެއެވެ. މިހެން އަޅުގަނޑު ދެންނެވުމުން ސުވާލުތަކެއް އުފެދިދާނެއެވެ. ފަރުމަސްވެރިކަން ކޮށްގެން މިހާރުވެސް، ފައިދާ ލިބެއެވެ. އާއެކެވެ. ތީ ތެދެކެވެ. އެހެންނަމަވެސް، ފަރުމަސް ބާނާގެން ރިސޯޓުތަކަށް ވިއްކާގެން މިހާރު ތިހޯދާ މަންފާއަށް ވުރެ، ބޮޑުމަންފާއެއް ލިބުމަކީ އެކަށީގެންވާކަމެކެވެ. އަދި މިގޮތަށް މަސައްކަތްކޮށްގެން ނަފާ ހޯދާމީހުން ވަރަށް ގިނައިން އެހެންއަތޮޅުތަކުގައި އުޅޭކަން ފާހަގަ ކުރެވެއެވެ. އަދި ހއ. ގައިވެސް އުޅުމަކީ އެކަށީގެންވާ ކަމެކެވެ.

ފަތުރުވެރިންނަކީ، ގަޢުމުތުގެ ޘަޤާފަތަށް ވަރަށް ބޮޑަށް ލޯބިކުރާބައެކެވެ. އަޅުގަނޑުމެންގެ ރަށުގައިވެސް ވަޒީފާނެތިފައި ތިބި ބަޔަކު ތިބުމަކީ އެކަށީގެންވާކަމެކެވެ. މިފަދަ މީހުންނަށް ގުރޫޕު ހަދައިގެން ކުރެވިދާނެ ވަރަށް ރަނގަޅު މަސައްކަތެއް އެބައޮތެވެ. އެއީ ރިސޯޓުތަކުގެ މެނޭޖުމެންޓާއި ގުޅިގެން އަޅުގަނޑުމެންގެ ޘަޤާފަތް ދައްކުވައިދޭ ތަމްސީލުތައް ކުޅުމެވެ.  މިހުރީ ހައްތަހާވެސް މަސައްކަތެވެ. އިޤްތިޞާދީގޮތުން ނަފާތަކެއް ހާޞިލުކުރެވިދާނެ ގޮތްގޮތެވެ.

އަޅުގަނޑު ދެކޭގޮތުގައި ރާއްޖޭގެ ފަތުރުވެރިކަން، ބަދަލުކުރަން ވެއްޖެއެވެ. އެހެނީ، ފަތުރުވެރިންނޭ ބުނެފިނަމަ، ދެން އެއީ އެންމެހާ ނުބައި އަމަލުތައް ކުރާ މީހުންގެ ގޮތަށް ލޭބަލް ކުރެވިފައި އޮންނަކަން ފާހަގަކުރެވެއެވެ. ހަޤީގަތުގައި ފަތުރުވެރިން އަންނަނީ ކުރިންވެސް ދަންނަވާލިގޮތަށް ގުދުރަތީ މަންޒަރުތައް ބަލައިލާ ހިތްހަމަ ޖައްސާ އުފާކޮށްލާށެވެ. ރާ ބޯކަށް ނޫނެވެ. ރާ ނެތަސް އެމީހުން އަންނާނެކަން ޔަޤީނެވެ. އަޅުގަނޑުގެ ދުއާއަކީ، ހުރިހާ ކަމެއްގައިވެސް ހެޔޮގޮތް ﷲ މިންވަރުކޮށްދިނުމެވެ.