ޕާޓީ ހަލާކު ކުރުން

 

އިންސާނުންނަކީ ވަރަށް ފާޑެއްގެ ބައެކެވެ. އެމީހާކު ނުވަތަ އެބަޔަކުން ކަމެއް ކޮށްދީފިނަމަ ވަރަށް ރަނގަޅު އެމީހަކީ ނުވަތަ އެބަޔަކީ ވަރަށް ރަނގަޅު މީހެއްކަމަށް ބުނެއެވެ.
ތެދުވެރި އިޙުލާސްތެރިއެކޭ ބުނެއެވެ. އެމީހަކަށް ހުޝާމަތު ކުރުމުގައި ބަސްތައް އިޝްރާފު ކުރުމުގައި ވަގުތު ނަގާލާނެއެވެ. އެމީހެއްގެ ނުވަތަ އެބައެއްގެ ފަރާތުން ހިތްހަމަ ނުޖެހޭ ކަމެއް ދިމާވެއްޖެ ނަމަ އެއަށްވުރެ ނުބާ ޖާހިލަކު ނުހުންނާނެއެވެ. އަދި އެމީހަކީ އެޙާލަތުގައި ދޮގުވެރި ޙިޔާނާތްތެރިއަކަށްވެސް ވެގެން ދެއެވެ.

އެކިދުވަސްވަރު، އެއިންސާނުން އުޅޭ މާހަޢުލުން އިވިގެންދާ ވާހަކަތައް ތަފާތުވެގެން ދެއެވެ. އެހެން ދިމާވާ ސަބަބަކީ އެމާހައުލެއްގައި ހިނގާ ހަރަކާތްތައް ތަފާތުވެގެން ދިޔުމެވެ. ބައެއް ދުވަސްވަރު ކުޅިވަރުގެ ވާހަކަ ދައްކައެވެ. އިޖުތިމާޢީ ތަފާތު ކަންކަމުގެ ވާހަކަ ދައްކައެވެ. އަދި އިންތިހާބުތަކުގެ ދުވަސްވަރު ދެއްކޭ ވާހަކަތައް ބޮޑަށް އޮންނަނީ ސިޔާސީ ވެފައެވެ. ސިޔާސީ ކަންކަމަކީ ވަރަށް ފާޑެއްގެ ކަމެކެވެ. ސިޔާސީ ދާއިރާއަށް ނިކުމެ މަސައްކަތް ކުރާ މީހާއަށް އެކަން އިޚްސާސް ވެގެން ދާނެއެވެ. މަލާމާތާއި ފުރައްސާރަ ކުރުން އަމާޒުވާ މީހާއަށް ކުއްލިގޮތަކަށް ހުޝާމަތުކުރަން ފަށާފާނެއެވެ. އެމީހާ ކުރިން ކޮށްފައިވާހާ ފާފައެއް ނަމަ ފުހެވިއްޖެ ކަހަލައެވެ. މިއީ ސިޔާސީގެ ހަޤީގަތެވެ.

އެގޮތުން މިވޭތުވެދިޔަ އިންތިހާބުތައް ނިމުމަށްފަހު އާ އިންތިހާބަކާއި ކުރިމަތިވަމުން މިދާ ދުވަސްވަރު އެންމެ ބޮޑަށް މި އިހަވަންދޫގެ މުޖުތަމަޢުން އެންމެ ބޮޑަށް އަޅުގަނޑަށް އިވޭ އަޑަކީ "ޕާޓީ ހަލާކު ކުރަނީ މިވެނި އެވެނި ބަޔެކޭ "މިގޮތަށެވެ. މީގެ ޙަޤީގަތަށް ނަޒަރު ހިންގާލަމާ ހިނގާށެވެ. މިއިޝާރާތް ކުރަނީ އިހަވަންދޫގެ ޕީޕީއެމްގެ ގޮފިތަކުގެ ވާހަކައަށެވެ.

2013 ވަނަ އަހަރުގެ ރިޔާސީ އިންތިހާބުގައި ޕީޕީއެމްގެ ކެނޑިޑޭޓަށް ކާމިޔާބު ހޯދުމަށްޓަކައި އިހަވަންދޫގެ ޕީޕީއެމްގެ އާމު މެންބަރުން ހިތްމަތާއެކު މަސައްކަތް ކުރަމުން ދިޔައެވެ. އެގޮތަށް މަސައްކަތް ކުރަމުން ދަނިކޮށް ދިމާވި ހިތް ހަމަ ނުޖެހުމަކާ ގުޅިގެން ގާތްގަނޑަކަށް ވޯޓް ލުމުގެ ދުދުވަހަށް ވެފައި ހުއްޓާ އިސްކޮށް ހުރިފަރާތް އެއްފަރާތަކަށް ޖެހި އެކަން ކުރެވެން ނެތްވާހަކަ ބުނަމުން ދައައެވެ. އެހެންނަމަވެސް އެއިންތިހާބު ކާމިޔާބު ކުރުމުގެ ޝަޢުގުވެރިކަން އޮތްމިންވަރުން މިހާރު "ޕާޓީ ހަލާކު ކުރާކަމަށް އެބުނާ މީހުން" އެފަރާތާ ވާހަކަ ދައްކާ އެކަން ހައްލުކުރިއެވެ.

7 ސެޕްޓެމްބަރ ގެ ބޭއްވި އިންތިހާބު ނިމިގެން ދިޔުމަށްފަހުން ދެވަނަ ބުރަކަށް ތައްޔާރުވަމުން ގޮސް ވަކިހިސާބަކުން އަނެއްކާވެސް އިސްކޮށް ހަރަކާތްތެރިވި ފަރާތް އެއްފަރާތަކަށް ޖެހިއްޖެއެވެ. މިފަހަރުވެސް  "ޕާޓީ ހަލާކު ކުރާކަމަށް އެބުނާ މީހުން" އެފަރާތާ ވާހަކަ ދައްކާ އެކަން ހައްލުކުރިއެވެ. ނަމަވެސް ކަންދިމާވި ގޮތުން މިފަހަރު އިންތިހާބު ބޭއްވޭ ގޮތެއް ނުވިއެވެ. އަދި ސުޕުރީމް ކޯޓްގެ އަމުރަށް އެނަތީޖާ ބާތިލުކޮށް އަލުން އިންތިހާބު ބޭއްވުމަށް ނިންމުމާ ގުޅިގެން އާހިތްވަރަކާއެކު ޕީޕީއެމްގެ އާމު މެންބަރުން ޕީޕީއެމްގެ ކެނޑިޑޭޓަށް ކާމިޔާބު ހޯދާ ދިނުމަށް ދިޔައީ މަސައްކަތް ކުރަމުންނެވެ. މިހެން މަސައްކަތް ކުރަމުން ދަނިކޮށް އިންތިހާބު ބާންވަން 3 ދުވަހަށް ވެފައި ވަނިކޮށް އަނެއްކާވެސް ބޮޑާ ދައްކަން ފަށައިފިއެވެ. އޭނާ ބުނަމުން ދިޔައީ އެނާ ހުރި މަގާމުން އޭނާ އިސްތިޢުފާ ދިނީ ކަމަށާއި ދެން ކަލޭމެން އަމިއްލައަށް ކުރިއަށް ގެންދިއުމަށެވެ. އަދި އެވާހަކަ މައިތަނަވެސް އޭނާ ވަނީ އަންގާފައެވެ. ދުވަސްވީ މީހުންގޮސް ރޮއެ ހެދުމުންވެސް އޭނާ ގޮތް ދޫ ނުކުރިއެވެ. ސުވާލަކީ މިއަށްވުރެ ބޮޑު ގެއްލުމެއް ޕާޓީއަކަށް ދެވިދާނެ ހެއްޔެވެ؟

އެގޮތަށް ކަން ހިނގާފައިވަނިކޮށް، އިހަވަންދޫގައޮތް ތާއިދު ދެމެހައްޓާ ކާމިޔާބު ހޯދާ ދިނުމަށް އެއޮތް 3 ދުވަހުގެ ތެރޭގައިވެސް ހިތްވަރާއެކު މަސައްކަތް ކުރުމަށް ތިބީ "ޕާޓީ ހަލާކު ކުރާކަމަށް އެބުނާ މީހުން" އެވެ. ސުވާލަކީ މިއީ ޕާޓީ ހަލާކު ކުރުން ތޯއެވެ. ދެން ފުރަތަމަ ބުރުގެ ނަތީޖާ ލިބި ދެވަނަ ބުރަކަށް ޕީޕީއެމްގެ ކެނޑިޑޭޓް ދިޔަކަން ކަށަވަރުވުމާއެކު ޕީޕީއެމްއާ ގުޅުމަށް އެހެން ފަރާތްތަކާއި ބައްދަލުކޮށް އެކަމަށްވެސް އެދުނީ ހަމަ  "ޕާޓީ ހަލާކު ކުރާކަމަށް އެބުނާ މީހުން" ނެވެ.

ސިޔާސީގޮތުން ޕީޕީއެމްއާއި ހިޔާލުތަފާތު ބައެއް ފަރާތްތައް ހާއްސަކޮށް ޖުމުހުރީއަށް ނިސްބަތްވާ ފަރާތްތައް ގުޅުމާއެކު ﷲ ގެ އިރާދަފުޅާ ރަހުމަތް ފުޅުން ކުރިން މައުމޫނުގެ ފިކުރަށް އޮތްތާއިދަށް ވުރެ ބޮޑު ތާއީދެއް އިހަވަންދޫ ހޯދިއެވެ.

 ދެން އައީ ލޯކަލް ކައުންސިލްގެ އިންތިހާބަވެ. އެ އިންތިހާބަށް ތައްޔާރު ވުމަށްޓަކައި ކޯލިޝަން ނިސްބަތްވާ ގޮތަށް ކެންޕެއިން މެނޭޖަރުންނާއި ކޮމެޓީ ނެގިގެން ހިނގައްޖެއެވެ. އެހެންނަމަވެސް ޕީޕީއެމްގެ އިސްކޮށް ހަރަކާތްތެރިވާ ފަރާތްތަކާއި ކަންކަން ހިނގާ ގޮތާމެދު މަޝްވަރާކޮށް ހިއްޞާ ނުކުރާކަން ފާހަގަ ކުރެވެއެވެ. އިންތިހާބު ބޯމަތިވެ، ކާރިވިއިރުވެސް ކޯލިޝަންގެ ކެމްޕެއިން ނުޖައްސާތީ ޕީޕީއެމްގެ އާމު މެމްބަރުން ތިބީ މާޔޫސްވެފައެވެ. ކަންމިގޮތަށް ހިނގާފަވަނިކޮށް ކުއްލިގޮތަކަށް ޕީޕީއެމްގެ އިހަވަންދޫގައި އިސްކޮށް ހަރަކާތްތެރިވާ ފަރާތްތަކާ ކެނޑިޑޭޓުން ބައްދަލުކޮށް ޕީޕީއެމްގެ ފަރާތުން މިކަމަށް ވެދެވެން އޮތް އެހީތެރިކަމެއް ދިނުމަށް އެދުނެވެ.

ނަތީޖާއެއްގެ ގޮތުން ޕީޕީއެމްގެ އިސްސަފުގައި މަސައްކަތް ކުރާފަރަތްތައް  "ޕާޓީ ހަލާކު ކުރާކަމަށް އެބުނާ މީހުން" ރިޔާސީ އިންތިހާބުގައި ކެމްޕެއިން ކޮށްދިން އަންހެންވެރިންނާއި ބައްދަލުކޮށް ކެމްޕެއިން ކުރެވޭ އިންތިޒާމު ހަމަޖައްސާ އެފަރާތްތައް ގުރޫޕުތަކަށް ބަހާލުމަށްފަހު ކޯލިޝަންގެ ކެމްޕެއިން މެނޭޖަރާ ހަވާލު ކުރެވުނެވެ. އެހެންނަމަވެސް އޭނަގެ ފަރާތުން އެކަމަށް ސަމާލުކަން ނުދިނެވެ. އެހެންކަމުން ޕީޕީއެމްގެ އިސްސަފުގައި ހަރަކާތްތެރިވި މީހުން "ޕާޓީ ހަލާކު ކުރާކަމަށް އެބުނާ މީހުން" ނިންމީ ޕީޕީއެމްގެ މީހުންވެސް ކޯލިޝަންގެ ހުރިހާ ކެނޑިޑޭޓުންނަށް ކާމިޔާބު ހޯދާ ދިނުމަށް މަސައްކަތް ކުރުމަށެވެ.  ކެމްޕެއިން ކުރަން ހިނގި ފަރާތްތަކުގެ ކާރީގަ އެދިފަވެސް އޮންނާނީ ކޯލިޝަންގެ ހުރިހާ ކެނޑިޑޭޓުންނަށް ވޯޓު ހޯދާ ދިނުމަށެވެ. އަދި ކޮންމެ ގުރޫޕެއްގައި ކެނޑިޑޭޓުންނާއި ކެނޑިޑޭޓުންގެ މަންދޫބުންވެސް ބާވެރިވިއެވެ. މިއީ އަޅެ ފަހެ ޕާޓީ ހަލާކު ކުރުމޭ ބުނެވި ދާނެ ހެއްޔެވެ؟

ދެން އޮތީ ކޯލިޝަންގެ ވާހަކައެވެ. އަޅުގަނޑު ޤަބޫލު ކުރާ ގޮތުގައި ކޯލިޝަނަކީ އުވިގެން ހިގާދާނެ އެއްޗެކެވެ. ކޯލިޝަނަށް އަންނަ ކެނޑިޑޭޓަކީ ޖުމުހުރީ ޕާޓީން އަންނަ ކެނޑިޑޭޓަކަށް ވާއިރު، އެކެނޑިޑޭޓަށް ޕީޕީއެމްގެ މެމްބަރަކު ތާއިދު ނުކުރުމަކީ ޕީޕީއެމް ހަލާކުރުމޭ ބުނެވޭނީ ކޮން ގޮތަކަށް ހެއްޔެވެ؟ އަދި ކޯލިޝަން ރޫޅިގެން ދާހިނދު ޕާޓީ ދާއަތަކަށް ދާކަހަލަ ކެނޑިޑޭޓަކު ހޮވުމަށް ވުރެ ޕީޕީއެމްއަށް ފައިދާ ހުރި ގޮތަކަށް ވާނީ ޕާޓީއަށް އިތުބާރު ހުރި މިނިވަން ކެނޑިޑޭޓަކު ހޮވުން ކަމުގައި ބެލެވެއެވެ.

އަޅުގަނޑުގެ ދުޢާއަކީ ﷲ އަޅުގަނޑުމެން އެންމެންނަށް ހެޔޮ ވިސްނުންދެއްވެމެވެ.