ލިޔުނީ ޢާޞިމް/ އުންމީދު ހއ.އިހަވަންދޫ
އޭ އަޅުގަނޑުގެ ލޮބުވެތި އަޚުންނާއި އުޚުތުންނޭވެ! ތިޔަބައިމީހުން الله تعالىއަށް ބިރުވެތިވެ، ތަޤްވާވެރިވާށެވެ. އަދި އެއިލާހުގެ ޙަޟްރަތަށް ވާޞިލުވެވޭނޭ އެންމެ މައިގަނޑުއެއް ވަޞީލަތް ކަމުގައިވާ ޢިލްމު ހޯދުމުގައި ގަދައަޅާ މަސައްކަތްކުރާށެވެ. އެއަށްފަހު އެ ޢިލުމުގެ މައްޗަށް ތިޔަބައިމީހުންގެ އުޅުމާއި ގުޅުން ބައްޓަންކުރާށެވެ. އަދި ދަންނާށެވެ! ދީނީ ޢިލްމު ހޯދުމައްޓަކައި މަސައްކަތް ކުރާ މީހާ ކީރިތި ޤުރްއާނާއި، މޫރިތި ސުންނަތް ދެނެގަނެވޭނެ މަގުތައް ޚިޔާރުކޮށް އެގޮތުން އެޢިލުމު ހޯދާށެވެ.
ޢިލްމު ހާޞިލްކުރުމަކީ އެތައް ގިނަގުނަ ހެވަކާއި ދަރުމައެއް ލިބޭކަމެކެވެ.
ފަހެ، ނަބީބޭކަލުން ދުނިޔެ ދޫކޮށްދިޔައިރު ވާރުތަ މުދަލުގެގޮތުގައި ބެހެއްޓެވީ އަލިމަހެއް އަދި ރަނެއް ވެސް ނުމެނޫނެވެ. އެބޭކަލުން ދޫކުރެއްވި ހަމައެކަނި ވާރުތަ މުދަލަކީ ޢިލްމެވެ. ނަބީބޭކަލުންގެ ވާރިޘުންނަކީ ކޮބާއިކަން ތިޔަލޮބުވެތި އަޚުންނަށް އެނގިވަޑާގަންނަވާތޯއެވެ.؟ އާއެކެވެ. ތިހީކުރެއްވީ ރަގަޅަށެވެ. ޢިލްމުވެރިންނަކީ ނަބީ ބޭކަލުނގެ ވާރިޘުންނެވެ. މިދެންނެވީ އެއްގޮތަކަށްވެސް ރޯނު އެދުރުންކަމުގައި ދެކެވަޑައި ނުގަންނަވާށެވެ.
ނަމަވެސް ހިތާމަޔަކީ، މިކަޢުނު ޖާހިލުކަމުގެ ކަޅުދުންތަކުންފުރި މިކައުނު ފުސްވަމުންދާ ކަމެވެ. ހިތާމައިގެ ކޮޅުނެތް ކޮޅަށް ހިތާމައެވެ. މިއަދުމިވަނީ ޖާހިލުކަމާއި ރޯނުއެދުރުން އިންތިހާއަށް ގިނަވެފައެވެ. ހެޔޮލަފާ ތަޤްވާވެރި، ދީނީ ވަރަޢްވެރި، ޢިލްމުވެރީން މިދަނީ ދުވަހަކަށްވުރެ ދުވަހެއް މަދުވަމުންނެވެ. އެފަދަ، ތެދުވެރި ޙަޤީޤީ ޢިލްމުވެރީން، އަތުގެ އިނގިލިތަކުން ކައުންޓު ކޮށްލެވޭހާވެސް މަދެވެ. މިއީ ވަރަށް ނުރައްކާތެރިކަން ބޮޑު ކަމެކެވެ. ހަޤީގަތަކީ އެފަދަ ޢިލްމުވެރިންނަކީ މިއުއްމަތަށް ހުރި ލާބައެކެވެ. ޢަދުއްވުންނަށް ހުރި ބިރުވެރިކަމަކާއި އަދި ނިކަމެތިކަމެކެވެ.
މާތް ﷲ އަޅުގަނޑަށާއި ތިބާ އަށް ރަޙްމަތްލައްވާށިއެވެ! ފަހެ އަޅުގަނޑުމެންނަށް މިދީން އުނގެނި، ދަސްކުރުން ވާޖިބުވެގެންވެއެވެ. އަދި، އެހެންމެ އުނގެނި، ދަސްކުރާ އެއްޗަކަށް ޢަމަލުކުރުންވެސް ވާޖިބުވެގެންވެއެވެ. އަދި މިއުންމަތް ހަލާކުވެގެންދަނީ ދަންކަމަށް ހަދާގެން އުޅޭ ޢިލްމުވެރިންގެ ސަބަބުންނެވެ. މިކަމަށް އިސާރާތް ކުރައްވާ މާތްﷲ ގެ ނަބިއްޔާ ހަދީޘް ކުރައްވާފައިވާ ބަސްފުޅެއްގެ މާނައިގަވެއެވެ. "ހަމަކަށަވަރުން މާތް ﷲ އެކަލާނގެ އަޅުތަކުންގެ ކިބައިން ޢިލްމުތައް ނިގުޅާގަތުމަކުން ނިގުޅައެއް ނުގަންނަވަތެވެ. އެކަމަކު އެނކަލާނގެ ޢިލްމުތައް ފުއްސަވަނީ ޢިލްމުވެރިން މަރުގަންނަވާގެންނެވެ. މިހެންގޮސް އެއްވެސް ޢާލިމަކު ނުބަހައްޓަވާ ހަމައަށް ދިއުމުން މީސްތަކުން ޖާހިލުން ޢާލިމުން ކަމުގައި ބަލަން ފަށައެވެ. ފެހެ އެމީހުން ސުވާލުކުރުމުން ނޭނގިތިބެ ފަތުވާ ދެއެވެ. ފެހެ އެމީހުން މަގުފުރެދި އެހެންމީހުން މަގުފުރައްދައެވެ. " ( ދީނީކަންތައްތަކުގައި ހައްދުފަހަނަ އަޅާދިއުން މިފޮތުން ނަގާފައި) އޭ އަޅުގަނޑުގެ ލޮބުވެތި އެކުވެރިންނޭވެ. މިއީ ވަރަށް ބޮޑަށް ސަމާލުވާން ޖެހޭކަމެކެވެ.
އޭ އެންމެހާ އެކުވެރިންނޭވެ! އަޅުގަނޑުމެންނީ ޞައްޙަ އިލްމު އުނގެނި ރަނގަޅު ގޮތުގައި އެޢިލްމު އެހެން މީހުންނަށް ފޯރުކޮށްދޭ ބަޔަކު ކަމުގައި ވަމާ ހިނގާށެވެ. ރަނގަޅު ޢިލްމުވެރިންނަކީ މިއުންމަތުގެ ބަޠަލުންކަން ހަނދާންކޮށް އެމީހުންނަށް ދޭންޖެހޭ ފުރިހަމަ ގަދަރު ދޭށެވެ.
No comments:
Post a Comment