ހިތުގައި ސުވާލުމާކުތަކެއް އުފެއްދިއްޖެ ދޯއެވެ. އަންނަނިވި ފޮޅުވަތްތަކުގައި ތިޔަހިތްތަކުގައި އުފެދިފައިވާ ސުވާލުމާކުތައް ފުލުސްޓޮޕްތަކަކަށް ބަދަލުކޮށްލެވޭނެ ކަމަށް ހީކުރަމެވެ. ހަރުދަނާ އިޤްތިސާދެއްގެ މައްޗަށް ބިނާވެފައިވާ މުޖުތަމަޢުއެއް ބޭނުންވާލެއް ހާދަބޮޑެވެ. އިޖުތިމާއި ހެޔޮފޭރާމެއްގެ މަތީގައި ބިނާވެފައިވާ މުޖުތަމަޢުއެއް ބޭނުންވާލެއް ހާދަބޮޑެވެ. ތިމާގެ އަތްދަށުން ދޫވެގެން ނަމަވެސް ކަސިޔާރުވެފައިވާ ކުދިން ރަނގަޅުކޮށް މި މުޖުތަމަޢުއަށް ފައިދާކުރަނިވި ބައެއްގެ ގޮތުގައި ހަދަން ބޭނުންވާލެއް ހާދަބޮޑެވެ. މިއިން ކޮންމެ ކަމެއް އެހާބޮޑަށް ބޭނުންޖެހިފައިވާ ހިނދު ވިސްނަންޖެހޭ ކަންތައްތަކެއް އެބަހުއްޓެވެ.
އަޅުގަނޑުގެ އެހެން ލިޔުންތަކުގައިވާނީ މިފަދައިން ވިސްނަންޖެހޭ ގިނަކަންކަމުގެ މައްޗަށް އަލިއަޅުވާލެވިފައެވެ. އެގޮތުން ތަރުބިއްޔަތެއް ކުރުމުގައި ވިސްނަންޖެހޭ ގިނަކަންކަމަށް އަލިއަޅުވާލެވިފައިވާނެއެވެ. މިލިޔުމުގައި އަލިއަޅުވާލަންބޭނުންވަނީ ތިމާގެ އަތްދަށުން ދޫވެގެން ނަމަވެސް ކަސިޔާރުވެފައިވާ ކުދިން ރަނގަޅުކޮށް މި މުޖުތަމަޢުއަށް ފައިދާކުރަނިވި ބައެއްގެ ގޮތުގައި ހަދާނެގޮތަކާމެދުއެވެ. އެފަދަކުދިންނަށް އަޑުގަދަކޮށް އެއްޗެހިކިޔާ އަދަބުދީ ހެދުމުގެ ބަދަލުގައި ކަންކުރަންވީ ރީތި އުސޫލުތަކެއް ކީރިތި މާތް ނަބިއްޔާ ވަނީ ދަސްކޮށްދެއްވާފައެވެ. އެ އުސޫލުން ކަންކުރާނަމަ އެފަދަ ގިނަކުދިން މުޖުތަމަޢުއަށް ފައިދާހުރި ބައެއްގެ ގޮތުގައި ހެދުމަކީ މާ އުނދަގޫ ކަމެއް ނޫނެވެ.
ތިމާގެ އަތްދަށުން ދޫވެ، ކަސިޔާރުވެފައިވާ ކުދިން ރަނގަޅުކޮށް މި މުޖުތަމަޢުއަށް ފައިދާކުރަނިވި ބައެއްގެ ގޮތުގައި ހެދުމަށް މަސައްކަތް ފަށާއިރު އެކުދިންނަށް މުޚާތިބުކޮށް ނަސޭހަތް ދިނުމުގައި ވިސްނަންޖެހޭ ކަންކަން އެބަހުއްޓެވެ. އޭގެތެރެއިން ބައެއްކަންކަން ތިރީގައި މިދަންނަވާލަނީއެވެ.
1. ކުށްކުރި ކުއްޖާނޭނގޭގޮތަށް އެންމެންގެ ތެރޭގައި އެކުރިކުށަކީ ކިހާވަރެއްގެ ކަމެއްކަމާއި އެކަމުން ކުރާނެ ނޭދެވޭ އަސަރު ކިޔާދިނުމަށްފަހު، އެކަން އިސްލާޚުކުރުމަށް އެނގުން
2. ކުށްކުރި މީހާ ނުވަތަ ކުއްޖާއާއި ނަސޭހަތްދޭމީހާ އެކަހެރިވެ، ސިއްރުވެރިގޮތަކަށް ކުށްކުރިކުއްޖާއަށް އޯގާތެރިކަމާއެކު ނަސޭހަތްތެރިވުން
3. މައިންބަފައިންގެ ކުރިމަތީގައި އެކުއްޖާއަށް އޯގާތެރިކަމާއެކު ނަސޭހަތްތެރިވުން
4. މުޖުތަމަޢުއަށް ރިޔާއަތްކޮށް ލޯތްބާއި އިޚްތިރާމާއެކު ނަޞޭހަތްތެރިވުން. މިއެވެ.
އަޅުގަނޑުމެންގެ މިފެހިޖަޒީރާ ރަށްތަކުގެ ގަޢުމީ ޝިޔާރެއްގެ ގޮތުގައި ކުރިން އޮތް " އިޚްތިރާމް ކުރާށެވެ – އިޚްތިރާމް ލިބިގަންނާށެވެ." މިޝިޔާރު މިއީ އަޅުގަނޑުމެން ނަމެއްގައި ބާއްވަންވާނެ ޝިޔާރެއް ނޫނެވެ. އެހެންނަމަވެސް މިޝިޔާރުގައިވާ ބަސްކޮޅަށް ޢަމަލުކުރެވެންވެސް ޖެހޭނެއެވެ. ހަޤީގަތުގައި އަޅުގަނޑުމެންގެ ޒުވާނުންގެ ތެރެއިން ގޯސްކޮށް އުޅޭ ކުދިން އަނބުރާ މުޖުތަމަޢުއަށް ނުގެނެވެނީވެސް އިޚްތިރާމް ކުރުމުގެ މުހިންމު ސިފަ އަޅުގަނޑުމެންގެ ތެރޭގައި ނެތުމުންނެވެ. ބައެއް މީހުން ގަބޫލުކުރާގޮތުގައި އިޚްތިރާމް ކުރަންޖެހެނީ ހަމައެކަނި ސަރުކާރުގެ ވެރިންނާއި ދަޢުލަތުގައި އިއްޒަތްތެރިންނޭ މިކިޔާ މީހުންނަށް އެކަންޔެވެ. ދެން ތިބި މީހުންނަކީވެސް އިއްޒަތެއް އަބުރެއް އޮންނަ ބައެއްގެ ގޮތުގައި އެމީހުން ގަބޫލުކުރިނަމަވެސް ޢަމަލުން ފެނިގެންދަނީ ދިމާ އިދިކޮޅަށެވެ. ތިމާމެންގެ އަމިއްލަ ދަރިންނާ އޯގާތެރިކަމާއި އިޚްތިރާމުގެ ވަސްވެސް ނެތްގޮތަށް ޢަމަލު ކުރުމުގެ ނަތީޖާއަކަށް ވަނީ އެކުދިންގެ އެންމެ ފުރަތަމަ ޖަމާއަތް ކަމަށްވާ ޢާއިލާގެ އެންމެ އިސްވެރިން ދެކެފޫހިވުމެވެ. އެކުދިންގެ މައިންބަފައިން ދެކެފޫހިވުމެވެ.
އަބޫހުރައިރާ ރިވާކުރެއްވިއެވެ. ރަސޫލާ ޙަދީޘް ކުރައްވާފައިވެއެވެ." ރަސޫލާ ހަސަނު ބުން ޢަލީއަށް ބޮސްދެއްވިއެވެ. އެވަގުތު އެތަނުގައި ހާޒިރުވެ ހުންނެވި އަލް އަގުރައު ބުން ހާބިޝް އައްތަމީމީ ވިދާޅުވިއެވެ. ތިމަންގެ 10 ދަރިންތިބެއެވެ. ދުވަހަކުވެސް އެއިން ކުއްޖަކަށް ދޮނެއް ނުދެމެވެ. އެހިނދު ރަސޫލާ ޙަދީޘް ކުރެއްވިއެވެ. ރަހުމު ނުކުރާ މީހަކަށް ރަހުމަތެއް ނުވެއެވެ. "
އެހެންކަމުން ތިމާގެ ދަރިންގެ ކިބައިން ތިމާ މުސްކުޅިވާ ދުވަހު، ތިމާއަށް އޯގާތެރިކަމާއި، އިޚްތިރާމް ހޯދަންބޭނުންނަމަ އެކުދިންނަށް އޯގާތެރިކަމާއެކު ވިސްނާދޭށެވެ. ނޫންނަމަ އެކުދިން ހައްތަހާވެސް ފެއަށްދާނީއެވެ. އާދޭހެވެ. މަރްޔަނބުގެއްލި ކަތިވަޅި ގެއްލި އެންމެ ފަހުން ކޮށި ދަނޑުވެސް ގެއްލޭނީއެވެ. ތިމާގެ ދަރިން ކުރާ ގޯސްކަންކަމުން ސަލާމަތް ކުރުމަށްޓައި އެކުއްޖާއަށް ނަސޭހަތްދޭންވާނީ އެކުރެވުނީ ކުށެއްކަމަށް އެކުއްޖާއަށް އިޙްސާސް ކުރެވޭގޮތަށް އޯގާތެރިކަމާއެކުއެވެ.
ދެން އަޅުގަނޑުމެން ވިސްނާލަންވީ ނަސޭހަތްދީގެން ރަނގަޅު ނުވާކުދިންނަށް ދެންހަދާނެ ގޮތަކާމެދުއެވެ. އެކުދިން ހަމަ ވަގުތުން ޖަލަށް ލާނީހެއްޔެވެ؟ ނުވަތަ އިލޮށިފަތީގެ އިލޮށިތައް ހުސްވަންދެން ކުއްޖާގެ ގައިގާ ތަޅާނީހެއްޔެވެ؟ ނުވަތަ ތަނަކު ބަނދެފައި ކާންނުދީ ބަހައްޓާނީ ހެއްޔެވެ؟ ނޫނެކެވެ. އެކުދިންނަށް އަދަބުދިނުމުގައިވެސް ކަންތައް ކުރާނީ އެކުއްޖާގެ ހަޔާތް ނުގެއްލޭފަދަ ގޮތަކަށް އޯގާތެރި ކަމާއެކުއެވެ.
އަޅުގަނޑުމެންގެ އެންމެ ފުރަތަމަ އެދުރުކަލޭފާނުން ކަންތައްތައް ކުރެއްވި އޯގާތެރިކަމާއެކުއެވެ. މައްކާފަތަޙަ ކުރެއްވި ދުވަހު އެކަލޭގެފާނު ކަންތައްކުރެއްވި ހިތްތިރި އޯގާތެރި ގޮތަށް ނިކަންވިސްނަވާށެވެ. އެކަލޭގެފާނާއި އެކަލޭގެފާނުގެ އަޞްހާބުން މައްކާގެ މުޝްރިކުން ނިކަމެތިކަމާއެކު ގައުމުން ބޭރުކޮށްލީ ތިމަންމެންގެ ވެރި ރަސްކަލާނގެއަކީ ﷲ އޭ ބުނާތީއެވެ. އަދި އެވަރަކުން ފުދުނީކީ ނޫނެވެ. އިސްލާމުންނާއި ހަނގުރާމަކުރުމާއި ގޯނާކުރުން ކުރިއަށްވުރެ އިތުރު ކުރިއެވެ. އެހެންނަމަވެސް އާޚިރުގައި މުސްލިމުން ނަޞްރު ލިބި އެމީހުންނަށް ހިތުހުރި ގޮތެއް ހެދުމުގެ ބާރުލިބުމުން އެކަލޭގެފާނު ކަންތައް ކުރެއްވީ އޯގާތެރިގޮތަކަށެވެ. އާދޭހެވެ! އެ އެންމެންނަށް އަމާންދީ ފޮނުވާލީއެވެ. މިއީ ތަކުރާރުކޮށް ނަޞޭހަތް ދިނުމުންވެސް އިސްލާމްދިނަށް ނުވަދެތިބި މީހުންނަށް ރަސޫލާ ކަންތައް ކުރެއްވި ގޮތެވެ.
އަޅުގަނޑު މިދައްކަނީ އެއްވެސް ހާލެއްގައި، އިސްލާމީ ޝަރިއަތުގައި ކަނޑައެޅިފައިވާ ހައްދުތަކާއި އަދަބުތައް ނުދޭށެކޭ ނޫނެވެ. ހަމަޔަޤީނުންވެސް ތިމާގެއަތްދަށުން ދޫވެ، ކަސިޔާރު މަގުން ގޮސްފައިވާ،އަދި ތަކުރާރުކޮށް އިސްލާމްދީނުގައި ނަހީކުރައްވާ ހަރާމްކުރައްވާފައިވާ ކަންކަމަށް އަރާގަންނަކުދިން މުޖުތަމަޢުއަށް ބޭނުންތެރި ފައިދާހުރި ބަޔަކަށް ހެދޭނީ އިސްލާމީ ޝަރިއަތަށް ހުކުމްކޮށް ހައްދުތައް ދީނާއެއްގޮތަށް ގާއިމުކޮށްގެންނެވެ. އެހެންނޫނަމަ އަޅުގަނޑުމެން ބޭނުންވެގެން މި އުޅޭފަދަ މުޖުތަމަޢުއެއް ޤާއިމެއް ނުކުރެވޭނެއެވެ.
No comments:
Post a Comment