ދުންފަތް ...... މި ޢަމަލުކުރުން ހުއްޓާލަމާ

އަޅުގަނޑުގެ އެކުވެރިންނޭވެ. ކަމެއްގެ ނުރައްކާތެރިކަން އެނގިހުރެ އެކަމުގެ ތެރެއަށް ވަނުމަކީ ކީހާވަރެއްގެ ކަމެއްކަން އެނގޭތޯއެވެ. އެކަމެއް ކުރުމަށް ވުރެ، ނުކުރުމުން ފައިދާ ލިބޭ ކަންކަން ކުރުމުގެ ބޭނުމަކީ ކޮބައިތޯއެވެ. އަޅުގަނޑުމެންނަށް ދެއްވާފައިވާ އެންމެ މުހިންމު ނިޢުމަތްތަކުގެ (ބުއްދިއާ ވަގުތު) ބޭނުން ހެޔޮގޮތުގައި ހިފުމަށް މަސައްކަތް ނުކުރަނީ ކީއްވެގެން ތޯއެވެ؟ އަދިވެސް ވަގުތު އެބައޮތެވެ. ނިކަން ވިސްނާ ފިކުރު ހިންގާލާށެވެ.

އަޅުގަނޑުގެ މި ލިޔުން ކިޔާ އަޅުގަނޑުގެ އަޚުންނޭވެ. ދުންފަތުގެ އިސްތިއުމާލުކުރުމުން ހަށިގަނޑަށް ވަރަށް ބޮޑެތި ނުރައްކާތަކަކާއި ކުރިމަތި ލާންޖެހޭއެވެ. މިގޮތުން ފާހަގަ ކޮށްލެވޭ ކަންތައްތަކުގެ ތެރޭގައި ކެއްސުމާއި ކެންސަރު ޖެހުމާއި، ހިތުގެ ބަލިތަކާއި ނާރުތަކާއި ޅޭ ހޮޅިތައް ބެދުންފަދަ ކަންކަން ހިމެނެއެވެ. ހަޤީގަތުގައި މިއިން އެއްވެސް ކަމަކީ އެންމެ  ދުވަހަކުން ދެ ދުވަހަކު ދުންފަތުގެ އިސްތިއުމާލު ކުރުމުން ދިމާވާ ކަންކަމެއް ނޫނެވެ. އެހެންކަމުން ދުރާލާ މިކަމުން ސަލާމަތްވެ ތިބުމަކީ ވަރަށް ބޭނުންތެރިކަމެކެވެ. ބަލިވުމުގެ ކުރިން ސަލާމަތް ކަން ހޯދުމަކީ ބަލިވުމުން ފަރުވާ ހޯދމަށްވުރެ ހަރަދު ކުޑަ އަދި ރައްކާ ތެރިގޮތެކެވެ.

ތަފާސް ހިސާބުތަކަށް ބަލާއިރު  މުޅިދުނިޔޭގައި 5.4 މިލިއަން މީހުން ކެންސަރުޖެހިގެން ކޮންމެ އަހަރަކު މަރުވާކަމަށް ދިރާސާތަކަން ދައްކައެވެ. ހަމައެހެންމެ ދިރާސާތަކުން ދައްކާގޮތުގައި މިއަދަދު 2015ވަނަ އަހަރު 6.5 މިލިއަނަށް އަރައެވެ. ސުބުހާނަﷲ އެވެ. މިފަދަ ކަމެއްގެ ތެރެއަށް ތިޔަ އެކުވެރިން، ތި ގެނބެނީ ކީއްވެގެންތޯއެވެ.

މިޖަޒީރާ ދިވެހި ޤައުމުގައި ވެސް  ދުންފަތގެ އިސްތިއުމާލުކުރުމަކީ ވަރަށް އާއްމު ކަމެކެވެ. އަޅުގަނޑުމެންނީ މުސްލިމުންނޭ ކިޔައިގެން މިއުޅެވޭ ގޮތާއި މެދުވިސްނަން ވެއްޖެއެވެ. ވަގުތާއި ފައިސާ މިހާނުރައްކާ ކަމަކަށް އިސްރާފްކުރުމުގެ ބޭނުމަކީ ކޮބައިތޯއެވެ. މިމައްސލައަކީ ވަރަށް ހާއްޞަ ސަމާލުކަމެއް ދީގެން މީހުންގެ ހޭލުން ތެރިކަމަށް ގެނަން ވެފައި އޮތްކަމެކެވެ.

ދުންފަތުގެ އިސްތިއުމާލު ކުރަން ދިމާވާ ބައެއް ސަބަބު ތަކަށް އަލިއަޅުވައި ލާނަމެވެ. މިގޮތުން ބައެއް ފަހަރަށް އެކުވެރިންގެ ފަރާތުންވެސް ދުންފަތުގެ އިސްތިއު މާލުގެ މެދުވެރިއަކަށް ވެއެވެ. އަދި އެނެއްބައި ފަހަރަށް އުޅެންޖެހިފައިވާ ވެށީގެ ސަބަބުންނާއި ތިމާއަށް ވުރެން ބޮޑެތި މީހުން ކުރާ އަމަލަކަށް ވާތީ ވެސް ދުންފަރުގެ އިސްރިއުމާލު ކުރަން ފެށެއެވެ. އަދިވެސް އެތައް ސަބަބުތައް އެބަހުއްޓެވެ. ހަމައެހެންމެ ދުންފަތުގެ އިސްތިއުމާލު ކުރުމަކީ މަސްތުވާތަކެއްޗާ ދިމާއަށް ދާން ކޮށާލެވޭ މަގަކަށް ވެސް ބައެއްފަހަރަށް  ވެގެން ދެއެވެ. އޭ އެންމެހާ ޓީޗަރުންނޭވެ. މިކަމުން އަޅުގަނޑުމެންގެ ދަރިވަރުން ސަލާމަތް ކޮށްދިނުމަށް އެހީތެރިވެދޭށެވެ.
ދުންފަތުގެ އިސްތިއުމާލު ކުރާ މަދުބަޔަކު ނަމަވެސް އެހެން މީހުންނަށް އުނދަގޫވާގޮތަށް އަސަރުކުރާނޭހެން ކުރުމުމަކީ ވަރަށް ހިތާމަވެރި ކަމެކެވެ. އަދި ހަމައެހެންމެ އާމުން އެއްވެ އުޅޭތަންތަނުގައާއި ކުޑަ ކުދިން އެއްވެ އުޅޭތަންތަނުގައި މިއަމަލު ކުރުމަކީ އެހެން މީހުން މިކަމުގެ ތެރެއަށް ވަންނަން ދިމާވާ ސަބަބަކެވެ.

އަޅުގަނޑުގެ ދުއާއަކީ މި ނުރައްކާތެރި ވަބާއިން އަޅުގަނޑުމެން އެންމެ ސަލާމަތް ކޮށްދެއްވާ ތެދުމަގުގައި ސާބިތުވުމުގެ ހެޔޮތަޢުފީގު ﷲ މިންވަރު ކޮށްދެއްވުމެވެ.