މުއުމިނުންގެ ހިތުގައި ކީރިތި ރަސޫލާ މުހައްމަދު صلى الله عليه وسلم އަށް އޮންނަންޖެހޭ ލޯބި

-->

  ލިޔުނީ:އަޙްމަދު ޢާޞިމް 

  1.    ލޯބީގެ ތައަރަފެއް

އަސްލު މައުޟޫއަށް އިންސާފުކުރުމުގެ ކުރިން ލޯތްބަކީ ކޮބައިކަމާއި ލޯބިވާމީހާއާ ނުވަތަ ލޯބިކުރާ އެއްޗަކާ ދޭތެރޭ އިންސާނުން ކަންތައް ކުރަމުން އަންނަ ގޮތަށް ނަޒަރު ހިންގާ ލާނަމެވެ. އާދޭހެވެ! ލޯތްބަކީ އިންސާނާގެ ހަށިގަނޑުގައި އުފެދޭ ޖަޒުބާތުތަކެކެވެ. އެއީ އެއްޗެއް ނުވަތަ މީހާކާ ދޭތެރޭ ހިތްހަމަ ޖެހޭކަމުގެ އިހުސާސްތަކެކެވެ. މިފަދަ ޖަޒުބާތުތަކެއް އުފެދިއްޖެނަމަ ކަންތައްކުރެވޭ ގޮތްތައް ވަރަށް ގިނައެވެ. އެފަދަ ބައެއްކަންތައް ތިރީގައި މިދަންނަވަނީއެވެ.

ލޯބީގެ ޖަޒުބާތުތައް އުފެދެނީ މީހަކާދޭތެރޭގައި ނަމަ، އެމީހަކު ބުނާގޮތަށް ފުރިހަމައަށް ޢަމަލުކުރާނެއެވެ. އެފަދަ މީހަކުގެ ސިފަތަކަށް ތަޢުރީފުކޮށް ވާހަކަދައްކާނެއެވެ. އެފަދަ މީހަކު ނުރުހޭ އެއްވެސްކަމެއް ނުކުރާނެއެވެ. އަދި އެފަދަ މީހަކު ނުރުހޭ ކަންތައްތަކުންނާއި ނުކުރުމަށް ބުނެފައިވާކަންތައްތަކުން ދުރުހެލިވާނެއެވެ. އެމީހަކު ދެމިއޮތުމުގެ ޢާލަމަށް ދަތުރު ކުރިކަމުގައި ވިޔަސް އެމީހެއްގެ ޛިކުރާ އާކޮށް އެމީހާ ދެއްކެވި ނަމޫނާއާއި އެއްގޮތަށް ޢަމަލުކުރާނެއެވެ. ހަޤީގަތުގައި މާތް ނަބިއްޔާ صلى الله عليه وسلم އަށް އޮންނަންޖެހޭ ލޯތްބަކީ މިއަށްވުރެ ފުރިހަމަ ލޯތްބަކަށް ވާންޖެހޭނެއެވެ.

2.    ކީރިތި ރަސޫލާއަށް ލޯބިކުރާ މީހާ މާތް ﷲ އަށް ލޯބިކުރަން ޖެހޭނެއެވެ.

ކީރިތި ރަސޫލާ މުހައްމަދު صلى الله عليه وسلم އަކީ މާތް ﷲ ޞުބުހާނަހޫ ވަތައަލާ މިއުއްމަތައް ރަހުމަތެއްކަމުގައި ފޮނުއްވި ރަސޫލާއެވެ. އެކަލޭގެފާނުން ގޮވާލެއްވީ ތަފާތު ގިނަ ކަލާނގެތަކަކަށް އަޅުކަންކުރުމުގެ ބަދަލުގައި އެއްކައުވަންތަ ﷲ އަށް އަޅުކަން ކުރުމަށެވެ. އެއީ އެކަލޭގެ ފާނުންގެނެސްދެއްވި އިސްލާމް ދީނުގެ ފުރަތަމަ އަސާސެވެ. މާތް ﷲ سورة آل عمران 2 ވަނަ އާޔަތުގައި ވަހީ ކުރައްވަނީ    اللَّهُ لَا إِلَهَ إِلَّا هُوَ الْحَيُّ الْقَيُّومُ "މާނައީ ﷲ ފިޔަވައި ޙައްޤުވެގެން އަޅުކަމެއްވެވޭ އިލާހަކުނުވެއެވެ. އެކަލާނގެއީ ދިރިދެމިވޮޑިގެންވާ އެންމެހައި ތަކެއްޗެއް ބެލެހެއްޓެވުމުގައި ޤާއިމުވެވޮޑިގެންވާ ރަސްކަލާނގެއެވެ. (އަދާލަތު ޑޮޓް އޯރގުގެ ގުރުއާން ތަރުޖަމާ) އަދިވެސް އެކަލާނގެ سورة آل عمران 31 ވަނަ އާޔަތުގައި ވަހީ ކުރައްވަނީ قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ وَيَغْفِرْ لَكُمْ ذُنُوبَكُمْ وَاللَّهُ غَفُورٌ رَحِيمٌ މާނައީ "ކަލޭގެފާނު ވިދާޅުވާށެވެ! ތިޔަބައިމީހުން ﷲ ދެކެ ލޯބިވާ ކަމުގައި ވަނީނަމަ ފަހެ ތިޔަބައިމީހުން ތިމަން ކަލޭގެފާނަށް ތަބާވާށެވެ! އެއިރުން ﷲ ތިޔަބައިމީހުން ދެކެ ލޯބިވެ ވޮޑިގަންނަވާނެތެވެ. އަދި ތިޔަބައިމީހުންގެ ފާފަތައް ފުއްސަވައި ދެއްވާނެތެވެ. ﷲއީ ގިނަގިނައިން ފާފަ ފުއްސަވާ ނުހަނު އޯގާވަންތަ ރަސްކަލާނގެއެވެ." މިއާޔަތުން ދޭހަވާގޮތުގައި މާތް ﷲގެ ރުއްސެވުން ލިބޭނީ އެކަލޭގެފާނަށް ތަބާވެގެންނެވެ. އަދި އެކަލޭގެ ފާނަށް ތަބާވެވޭނީ އެކަލޭގެފާނުން ގެނެސްދެއްވި ދީނުގެ ފުރަތަމަ އަސާސުކަމުގައިވާ ﷲ ގެ އެއްކައުވަންތަކަމަށް އީމާންވެގެންނެވެ. އެދީނުގެ ތަޢުހީދުގެ ފުރަތަމަ ކަލިމާގައިވަނީ لَا إِلَهَ إِلَّا اللَّهُ މިހެންނެވެ. މާނައީ "ﷲ ފިޔަވައި އެހެން އިލާހުކުނުވެއެވެ." އެހެން ކަމުން އަޅުގަނޑުމެން މުސްލިމުން ﷲ ގެ ރަސޫލާއަށް ލޯބިކުރާނަމަ ﷲ އަށް އީމާންވެ ﷲ އަށް ލޯބިކުރަން ޖެހޭނެއެވެ.

(ނުނިމޭ)