އުމަވީ ދަޢުލަތުގެ އެންމެ ފާހަގަ ކޮށްލެވޭ އެއް ޚަލީފާ ޢުމަރު ބިން ޢަބްދުލް ޢަޒީޒް2

 

-->

4.   ޚަލީފާކަން ލިބިވަޑައިގެންނެވުމުގެ ކުރީގެ ހަޔާތްޕުޅު

އިސްވެ ދެންނެވުނުފަދައިން ޒުވާން އުމުރުފުޅު ހޭދަކުރެއްވީ މަދީނާގައެވެ. މިގޮތުގައި ހުންނަވަނިކޮށް ހިޖުރައިން 85 ވަނަ އަހަރު އެކަލޭގެފާނުގެ ބައްޕާފުޅު އަވަހާރަވުމުން، ބޮޑުބޭބޭފުޅު ޢަބްދުލް މަލިކުބުން މަރްވާނުގެ އަރިހަށްގެންދަވައި އެކަލޭގެފާނުގެ ފާޠިމަތުބުން ޢަބްދުލް މަލިކާ ކާވެނި ކޮށްދެއްވިއެވެ. އަދި ދިމިޝްޤުގެ ގަނޑުވަރުތެރޭގައި ގެންގުޅުއްވިއެވެ.
މިގޮތުގައި ވަލީދުބުން ޢަބްދުލް މަލިކުގެ ވެރިކަމާހަމައަށް ދިމިޝްޤުގައި ހުންނެވިއެވެ. ހިޖުރައިން 86 ވަނަ އަހަރު ޙިޖާޒުކަރާގެ ގަވަރުނަރުކަން ދެއްވަވާފައިމަދީނާއަށް ފޮނުއްވިއެވެ. 7 އަހަރު ވަންދެން މަދީނާގައި މަސައްކަތްޕުޅު ކުރެއްވެވިއެވެ. އެކަލޭގަފާނުން ހިޖާޒުކަރައިގެ ވެރިކަމުގައި ހުންނަވަނިކޮށް އެކަމުން ވަކިންކުރެއްވީ ހައްޖާޒުބުން ޔޫސުފް އެދިވަޑައިގެންނެވުމުގެ މަތިން ހިޖުރައިން 93 ވަނަ އަހަރުގައެވެ. މިކަމުގެ ސަބަބުން ވަލީދުގެ ހިތްޕުޅުގައި ޢުމުރުބުން ޢަބްދުލް ޢަޒީޒަށް ދެއްވާފައިވާ ޤަދަރާއި އިޙްތިރާމާއި ދަރަޖައަށް އެއްވެސް ބަދަލެއްނާދެއެވެ.

5.   މުއްސަނދި ދިރުއުޅުއްވުން

ޢުމުރުބުން ޢަބްދުލް ޢަޒީޒު ބޮޑުފުޅުވަމުން އައިއިރު މުއްސަނދި ކަމަށް ލޯބިކުރެއްވެއެވެ. އެކަލޭގެފާނަކީ ވެރިކަމުގެ ހާންދާނުގައި މުއްސަނދި ކަމުގެ ތެރޭގައި ބޮޑުފުޅުވީ ބޭފުޅެކެވެ. ފަޤީރުންގެ އިޙްސާސްތައް ޢިލްމުން މެނުވީ އެނގިވަޑައި ނުގަންނަވައެވެ.

އެކަލޭގެފާނު ހިންގަވާ މަގުގައި، އަތަރުވަސް ހިފާވަރަށް އަތަރުލައްވަވާ ބޭކަލެއްކަމުގައި ވިއެވެ. ފޭރާންކޮޅު ދިގުކުރެއްވުމާއި ހިންގެވުމުގައި ޙާއްޞަގޮތެއް ގެންގުޅުއްވުމާއި އިސްތަށިފިޅު ރީތިކޮށް އޮމާންކުރައްވައިގެން އުޅުއްވުމާއި، މިފަދަ މުއްސަނދި، ސާފު ޠާހިރު ގޮތްކޮޅުތަކަށް ލޯބިކުރެއްވެވިއެވެ. އެހެންނަމަވެސް ޚަލީފާކަން ލިބިވަޑައިގެންނެވުމަށްފަހު ހުރިހާކަމެއް ބަދަލުކޮށްލެއްވެވިއެވެ.

އެޒަމާނުގައި މީސްތަކުންކުރެ އެންމެ ރީތި ހެނދުން އަޅުއްވާއުޅުއްވި އަދި އެންމެ ވަސްމީރު ސެންޓު ޖައްސަވާ އުޅުއްވި ބޭކަލަކީ ޢުމުރުބުން ޢަބްދުލް ޢަޒީޒެވެ. ރަޖާޢުބުން ހައިވާގެ އަރިހުން ރިވާވެގެން އައިސްފައިވާ ގޮތުގައި " ޢުމުރުބުން ޢަބްދުލް ޢަޒީޒް ނުކުމެ ވަޑައިގެންފިނަމަ މުޅިއެތާނގައި އަތަރުވަސް ހުންނާނެވެ. އެޒަމާނުގައި އެންމެ ރީތި ހެނދުކޮޅުތައް ތުރުކުރައްވާ އުޅުއްވިއެވެ. ހިނގުމުގައި  އެންމެ ފަރިގޮތްތަށް ގެންގުޅުއްވީވެސް ޢުމުރުބުން ޢަބްދުލް ޢަޒީޒެވެ. ޚަލީފާކަން ލިބިވަޑާއިގެންނެވުމަށްފަހު، ހެދުންކޮޅުތަކަކީ މިޞްރުގެ ދެރަފޭރާންކަމުގައި ބަލާ،12 ދިރުހަމުގެ ފޭރާމެވެ."

އެކަލޭގެފާނު މަދީނާގެ ގަވަރުނަރަކަށް ހުންނެވިއިރި މީހަކު އަތަށް ދެއްވާގެން ހެދުމެއް ބައްލަވާ ގެންނެވިއެވެ. އެބޭކަލަކު ޢުމުރުބުން ޢަބްދުލް ޢަޒީޒަށް ހެދުމެއް ބައްލަވާގަތީ 400 ދިރުހަމަށެވެ. އޭގައި އަތްޕުޅު ބީއްސަވާލުމަށްފަހު ވިދާޅުވިއެވެ. " ކިހާ ހަރުކަށި ކިހާ ބާރުގަދަ ފޭރާމެއް ހެއްޔެވެ؟" ޚަލިފާކަމަށް އިސްވެ ވަޑައިގެންނެވުމަށްފަހު، ހެދުމެއް 14 ދިރުހަމަށް ބައްލަވާގެން އޭގާ އަތްޕުޅު ބީއްސަވާ ވިދާޅުވިއެވެ." ޞުބުޙާނަﷲ އެވެ. މިއީ ހާދަމަޑުމަޑު ފޮއްޗެކެވެ." ހާރޫނުބުން ޞާލިހު ކިޔާމީހަކު އޭނާގެ ބައްޕަގެ އަރިހުން ރިވާކުރައްވާ ގޮތުގައި އޭނާގެ ބައްޕަ ވިދާޅުވިކަމުގައިވަނީ" ތިމަން ދޮންނަ މީހާއަށް އިތުރު ދިރުހަމެއް ދީގެން ޢުމުރުބުން ޢަބްދުލް ޢަޒީޒްގެ ފޭރާމާއެކު ތިމައްމެންގެ ފޭރާން ދޮވެހެދީމެވެ. ސަބަބަކީ އެހެދުމުން ދުވާ މީރުވަހުންނެވެ."

6.   އަނބިއަނބިކަނބަލުންނާއި ދަރިދަރި ކައު ކަނބަލުން

އުމަރުބުން އަބުދުލް އަޒީޒް 4 ބޭކަނބަލަކާ ކާވެނި ބައްލަވައިގެންނެވިއެވެ. އެއީ ފާޠިމަތުބުން ޢަބްދުލް މަލިކުބިން މަރުވާނާއި، ލުމައިސްބިންތު ޢިލިއްޔުބުނުލް ޙާރިޝާއި، އުންމު އުޘްމާނުބިން ޞުއައިބުބިން ޒުއްބާން އެކަމަނާގެ އިތުރަށް އުއްމު ވަލަދަކާއި ހިމެނި ވަޑައިގަންނަވައެވެ. އެކަލޭގެފާނުގެ އަނބިކަނަބަލުންގެ ތެރެއިން އެންމެ ބޮޑަށް ފާހަގަކުރެވެނީ ފާޠިމާއެވެ.

މިހަތަރު އަނބިކަނބަލުންގެ ފަރާތްޕުޅުން އެކަލޭގެފާނަށް، 20 ދަރިކަލުން ލިބިވަޑައިގަތެވެ. އޭގެތެރޭގައި ހިމެނެނީ 17 ފިރިހެން ބޭފުޅުންނާއި 3 އަންހެން ބޭކަނބަލުންނެވެ.

ޢުމުރުބުން ޢަބްދުލް ޢަޒީޒުގެ ދަރިންނަކީ

1.     ޢަބްދުލް މަލިކު: މީނާއަކީ ބައްޕާފުޅެކޭ އެއްފަދައިން ތަޤުވާވެރިކަމާއި ޞާލިހުކަމުގައި އަރާހުންނެވި ބޭކަލެކެވެ. ބައްޕާފުޅުގެ އަރުހުގައި އޯގާތެރިކޮށް ހިތްތަވައި އުޅުއްވުމުގައި އެހީތެރިވެ ވަޑައިގެން އުޅުއްވި ބޭކަލެކެވެ. ބައްޕާފޫޅުގެ ވަޒީރަކަށެވެ.

2.     ޢަބްދުލް ޢަޒީޒް: ދެހަރަމްގެ ވާލީކަމުގެ މަޤާމް ޔަޒީދުބުނުލް ވަލޫދުގެ ޒަމާނުގައި ހިޖުރައިން 126 ވަނަ އަހަރު ލިބިވަޑައިގަތެވެ.

3.     ޢަބްދުﷲ: ޢިރާޤުގެ ވެރިކަން ކުރެއްވިއެވެ.

މިބޭފުޅުންގެ އިތުރަށް ދެން ތިއްބެވީ އާދަމް، އިބުރާޙީމް، އިސްމާޢީލް، އިސްޙާޤު، ޔަޢުޤޫބު، މޫސަ، ޢަބޫބަކުރު، ޙަފްޞް، ޢުބައިދުﷲ، ޢާޞިމް، އިޞްބަޣު، ޔަޒީދު، ވަލީދު، ޒައްބާން، ހިމެނެއެވެ. އަންހެން ބޭފުޅުންގެ ތެރޭގައި، އަމީނާ، އުއްމު އަންމާރު، އުއްމު ޢަބްދުﷲ ހިމެނެއެވެ. 

(އަދި ނުނިމޭ)