އޭތް! ކުޅެން ތިދަނީ ކީއްކުރަން! މިއަންނަ ހަފްތާގައި ޓެސްޓު ފެށޭނެ! ތިބޭކާރުކަމެ! ކިޔެވީމަ ވަޒީފާ ގަނޑެއްވެސް ލިބޭނީ!

-->

ލިޔުނީ އަޙްމަދު އާޞިމް 

އަޅުގަނޑުމެންގެ މިކުޑަކުޑަ ރާއްޖެ އަކީ ޖަޒީރާ ރަށްތަކެއްގެ މައްޗަށް އެކުލެވިގެންވާ ގަޢުމެކެވެ. މިގަޢުމަކީވެސް އެހެން ގަޢުމުތަކާއެކު ތަފާތު ކަންކަމުގައި ވާދަކުރަމުން އަންނަ ގަޢުމެއްކަން ކަށަވަރެވެ. މިގޮތުން ތަޢުލީމީ ގޮތުންނާއި އިޤްތިޞާދީ ގޮތުންނާއި، އުމުރާނީގޮތުން
އަދި ކުޅިވަރުގެ ދާއިރާގައި ވެސް ސަރަހައްދުގެ އެހެންގަޢުމުތަކާއި އެއްހަމައެއްގައި ފާތިލަތައް ސާބިތުކޮށްލުމަށް މަސައްކަތް ކުރަމުންދާ ޤަޢުމެކެވެ. މިގަޢުމަކީވެސް ތަފާތު އެތައް ރޮނގުތަކެއްގައި މޮޅެތި ފަންނާނުންތަކެއް ދިރިއުޅޭ ގަޢުމެއްކަން ޔަޤީނެވެ. މިހުރިހާކަމެގެ ކުރިއެރުން ބިނާވެގެންވަނީ ހަޤީގަތުގައި އެތަނެއްގައި ދިރިއުޅޭ ރައްޔިތުންގެ ދުޅަހެޔޮކަމާއެވެ.

މިސިލްސިލާގެ ދަށުން މިފަހަރު މިބަލާލަނީ ކުޅިވަރުގެ މައްޗަށެވެ. ކުޅިވަރުގެ މާނަ ވަރަށް ގިނަގޮތް ގޮތައްނަގައެވެ. މިގޮތުން އޭގެތެރެއިން ގިނަބަޔަކު ކުޅިވަރު މާނަކުރާގޮތަކީ ތިމާގެ ހިތްހަމަޖެއްސާލައި، މުނިފޫހިފިލުވުމަށް ތިމާ ބައިވެރިވެގެން ކޮށްއުޅޭ ކަންތައްތަކަށެވެ. މިގޮތުން ރާއްޖޭގެ އެންމެ ގިނަބަޔަކު ކުޅޭ ކުޅިވަރަކީ ފުޓުބޯޅައެވެ. މީގެއިތުރުން ކުޅެ އުޅޭ ކުޅިވަރުތަކުގެ ތެރޭގައި ވޮލީ، ބާސްކޭޓް ބަށިފަދަ ކުޅިވަރުތައް ހިމެނެއެވެ. މިއިންކޮންމެ ކުޅިވަރަކީވެސް އޭގެ ޒާތުގައި އެކުޅޭ ބަޔަކަށް ވަރަށް ގިނަގުނަ ފައިދާތަކެއް އެކުލެވިފައިވާ ކަންކަމެވެ.

އެހެންނަމަވެސް ހިތާމައަކީ، ކުޅިވަރު ކުޅުމާއިމެދެ ބެލެނިވެރިން، އެއީ ނުރައްކާތެރި އެއްޗެއްގެ ގޮތުގައި ދެކުމެވެ. އަދި ބައެއް ބެލެނިވެރިން އެއީ ނުރައްކާތެރި ކަމެއްކަމަށްވެސް ވިސްނާދެމުން ދާކަމެވެ. ﷲ ޞުބުހާނަހޫ ވަތަޢަލާ މިދުނިޔޭގައި ލައްވަވާފައިވާ ކޮންމެ އެއްޗަކީވެސް ދެޖިންސުން ލައްވަވާފައިވާ ތަކެއްޗެވެ. ހެވާއި ނުބަޔާ، ރީއްޗާއި ހުތުރު އަދި ފައިދާއާއި ގެއްލުން ހިމެނެއެވެ. ހަޤީގަތަކީ ކުޅިވަރުގެ ސަބަބުން ދިމާވާ ބައެއްކަހަލަ ހާދިސާތަކުގެ ސަބަބުން ގެންލުންތަކަކާއި ކުރިމަތިވި ކަމުގައިވިޔަސް އެއިން ބޮޑަށް ކުރަނީ ފައިދާއެވެ. ގެއްލުމެއް ނޫނެވެ. މިއީ އަޅުގަނޑުމެން ތަރައްޤީއާއި ދިމާލަށް މިސްރާބު ޖަހަމުންދާއިރު، ވަރަށް ބޮޑަށް ވިސްނާލަން ވެއްޖެކަމެކެވެ.

އޭތް، ކުޅެން ތިދަނީ ކީއްކުރަން! މިއަންނަ ހަފްތާއި ޓެސްޓު ފެށޭނެ!  ތިބޭކާރުކަމެ! ކިޔެވީމަ ވަޒީފާ ގަނޑެއްވެސް ލިބޭނީ! އާދެ މިއީ މިލިޔުމުގެ ސުރުހީއެއްގެ ގޮތުގައި ޖަހާފައިވާ ޖުމުލަތަކެކެވެ. މިއީ ވަރަށް ގިނަ ބެލެނިވެރިންގެ އަނގައިން ބޭރުވަމުން އަންނަ ޝުޢުރުތަކެކެވެ. ހަޤީގަތުގައިވެސް މިޒަމާނުގައި ރަނގަޅު ވަޒީފާއެއް ލިބޭނީ ތަޢުލީމު އުނގެނިގެންކަން ކަށަވަރެވެ. ކިޔަވާކުދިންނަކީ ގާތްގަނޑަކަށް މުޅިދުވަހުހެން ކިޔެވުމުގައި ހޭދަކުރަމުންދާ ބަޔެކެވެ. ސުކޫލުގައެވެ. ޓިޔުޝަނުގައެވެ. ހޯމްވޯކުތައް ހެދުމުގައެވެ. ފިލާވަޅުތައް ހެދުމުގައެވެ. އެހެންކަމުން އެކުދިންގެ ސިކުނޑިތައް ހުންނާނީ ވަރަށް ބޮޑަށް ވަރުބަލިވެފައެވެ. އެހެންކަމުން އެކުދިންވެސް ސިކުނޑިތާޒާ ކޮށްލުމަށް ކޮންމެވެސް ކުޅިވަރެއް ކުޅުމަށް 2 ގަޑިއެއް ހާއިރު ހޭދަކޮށްލުމަކީ މުހިންމުކަމެކެވެ.

ތަޢުލީމު އުނގެނުމުގެ ބޭނުމަކީ މުޖުތަޢު ބިނާކުރުމުގައި އެއުނގެނުނު ތަކެތީގެ ބޭނުން ހިފުމެވެ. ﷲ ޞުބުހާނަހޫ ވަތަޢަލާ މިކަޢުނުގައި އަޅުގަނޑުމެން ލެއްވިފަދައިން މިކަޢުނުގެ ހަލީފާވެރިވެ، ކަޢުނު އާރާސްތުކުންކަން ޔަޤީނެވެ. ހަމައެހެންމެ އެމަޤުޞަދު ހާޞިލުކުރެވެނީ ތަޢުލީމު ހާޞިލުކޮށްގެން އެތިބިބަޔެއްގެ ސިއްހަތު ރަނގަޅުނަމައެވެ. އާދޭހެވެ. ދުޅަހެޔޮ ޞިއްހަތެއްގައި ތިބުމަށް ކަސްރަތު ގެ ދަޢުރުވަރަށް ބޮޑެވެ. ކުޅިވަރު ކުޅުމަކީ ކަސްރަތު ކުރެވޭނެ އެއްގޮތެވެ. ހަޤީގަތުގައި، ގިނަފަހަރަށް ކަސްރަތު ކުރުމުގެ ނިޔަތުގައި އެކަންކުރުމަކީ އެހާފަސޭހަކަމެއް ނޫނެވެ. އަދި ކިއެއްތަ އެއީ ފޫހިކަމެއްގެ ގޮތުގައި އަދިވެސް ގިނަބަޔަކު ދެކެމުންދާކަން ފާހަގަކުރެވެއެވެ.

އަޅުގަނޑު ދެން މިބަލައލަނީ، ކަސްރަތުން ނުވަތަ ކުޅިވަރު ކުޅުމުން ލިބޭފައިދާ ތަކަށެވެ.

1.     ކަސްރަތު ކުރުމުގެ ސަބަބުން އިންސާނާގެ ބޭކާރު ސަރުބީތައް ވިރުވާލައެވެ.

2.     އެއީ، ހަށިގަނޑުގެ ފިޓުނަސް އެއްލެވަލެއްގައި ހިފަހައްޓާ ދެއެވެ.

3.     ހަށިގަނޑުގައި ބާރުޖައްސާދެއެވެ.

4.     ބަލިތަކުން ދިފާއު ވެގެން ދެއެވެ.

5.     ސިނކުޑި ތާޒާވެގެން ދާކަމެވެ.

ކަން މިހެން ހުރުމާއި އެކު ކުޅިވަރު ކުޅުމަކީ ވަރަށް ބޭނުންތެރިކަމެކެވެ. އަދި ތިއެންމެ ބޭފުޅުންނާއި، ތިއެންމެ ބެފުޅުންގެ ދަރިންނަށް ތަރުބިއްޔަތު ދިނުމުގައި އެކުދިންގެ ތަޢުލީމާއެއްވަރަށް ސިއްހަތައް ބެލުމަކީ މުހިންމުކަމެކެވެ. ކުޅިވަރު ކުޅުމައް ވަކި ވަގުތުތަކެއްގައި، ހުއްދަދިނުމަކީ ވަރަށް ބޭނުންތެރިކަމެކެވެ.

ކުޅިވަރު ކުޅުނުކަމުގައި ވިޔަސް، ނުވަތަ އެފަދަ އެހެންކަމެއް ކުރިކަމުގައި ވިޔަސް، އެކަމެއް ކުރަންޖެހެނީ ދީންނީ ހަމަތަކުގެ މަތިންކަން ހަނދާން ކުރައްޖެހެއެވެ. އިސްލާމްދީނުގެ އެއްވެސް އަސާސަކާއި ތަޢާރަޒުވާ އެއްވެސް ކުޅިވަރެއް ކުޅުމަށް ފުރުޞަތު ދީގެންނުވާނެއެވެ. މިގޮތުން އިސްލާމް ދީންވަނީ ކުޅިވަރުތަކުގެ ތެރެއިން ޖުވާކުޅުން ހަރާމް ކުރައްވާފައެވެ. އެހެންކަމުން ކުޅޭ އެއްވެސް ކުޅިވަރަކީ ޖުވާއާއި އެއްގޮތް ކުޅިވަރަކަށް ވެގެން ނުވާނެއެވެ.

މީގެ އިތުރުން ކުޅިވަރުތައް ކުޅޭއިރުގައި، ތިމާމެންގެ އައުރަނިވާ ކުރުމަކީ ވަރަށް ބޮޑަށް އިސްކަން ދޭނޖެހޭކަމެކެވެ. އެއީ އަޅުގަނޑުމެންގެ ތެރެއިން ވަރަށްގިނަ ބަޔަކު ޣާފިލުވެފައިވާ ކަމެކެވެ. އަދި އެއްވެސް ކުޅިވަރެއް ކުޅުމާއި މުބާރާތްތައް ރޭވުމުގައި އެއްވެސް އަޅުކަމަކަށް ފުށުއަރާ ފަދަގޮތަކަށް އަމަލު ކުރުމަކީ ކޮށްގެންނުވާނެ ކަމެކެވެ.

އަޅުގަނޑުގެ ދުޢާއަކީ ކަންތައްތައް ކުރުމުގައި ދީނުގެ އަސާސްތަކާއި އެއްގޮތްވާ ގޮތައް އަމަލުކުރާ، ދުޅަހެޔޮ ރައްޔިތުންތަކެއްގެ މިގައުމުގެ ރައްޔިތުން ލެއްވުމެވެ. އާމީން!