އަޙްމަދު ޢާޞިމް/ އުންމީދު ހއ.އިހަވަންދޫ
އިހަވަންދޫއަކީ ޒަމާނުންސުރެ ވަރަށް އެކުވެރި ހިތްހެޔޮ މުރާލި ރައްޔިތުންތަކެއް ދިރިއުޅެމުންދާ ރަށެކެވެ. ޒާމާނުންސުރެ އަވައްޓެރި ރަށްރަށުގެ މީހުން، އިހަވަންދޫ ސިފަކުރަނީ ހިތްހެޔޮ އެއްބައިވަންތަ ރަށެއްގެ ގޮތުގައެވެ. ކަންތައް އެހެން އޮތްކަމުގައި ވިޔަސް ކުރިން އިހަވަންދޫއަކީވެސް އެހެން ރައްތަކެކޭ އެއް ގޮތަށް އަވަށު ވާދަވެރިކަން ބޮޑު ރަށެކޭ ބުނެވިދާނެވެ. އަވަށު ވާދައިގެ ސަބަބުން އެދުވަސްވަރުވެސް އިހަވަންދޫއަށް ކުރީ މަންފާއެވެ. އެއީ ރަށުގެ އެންމެންގެ މެދުގައި ހާއްޞަކޮށް އެވަށެއްގެ ރައްޔިތުންގެ މެދުގައި އޮތް އެއްބައިވަންތަކަމާއި، އަވަށް ކުރިއެރުވުމަށް ބޭނުންވެ ޢަމަލީގޮތުން މަސައްކަތް ކުރާނެ ބަޔަކު އެ މުޖުތަމަޢުގައި އުޅޭތީއެވެ.
އެހެންނަމަވެސް، މިހާރު ޒަމާން ބަދަލުވެއްޖެއެވެ. ހަމައެއާއެކު ކުރާނެ މަސައްކަތްތައް ގިނަވެއްޖެއެވެ. ސިޔާސީ ގޮތުންނާއި އިޖުތިމާއިގޮތުން މީހުން ހޭލުންތެރިވެއްޖެއެވެ. މިހާރު މިވަނީ އަވަށު ވާދަވެރިކަން މުޅިންހެން ކެނޑި ގޮސްފައެވެ. ދެން މިހާރު އުފެދޭ ސުވާލަކީ މިފަދަ މުޖުތަމައަކަށް ބޭނުންވަނީ ގިނަ މަޤްޞަދުތަކެއް ހާޞިލުކުރުމަށް އުފައްދާ ގިނަ ޖަމާއަތްތަކެއްތޯ؟ ނުވަތަ މުޖުތަމައުއަށް ބޭނުންވާ ވަކި އެއްމަޤްޞަދު ހާޞިލުކުރުމަށް ހަދާ ތަފާތު މަޤްޞަދުތައް ހާޞިލު ކޮށްދޭނެ ގިނަ ޖަމާއަތްތަކެއްތޯއެވެ؟ އެތައްބައިވަރު ޖަމާއަތްތަކެއް އުފެދުމުން މުޖުތަމައަށް ކުރަނީ ފައިދާތޯއެވެ. ނޫނީ ގެއްލުންތޯއެވެ؟
ހަޤީގަތުގައި ގިނަ ޖަމާއަތްތަކެއް އުފެދުމުން ކުރާނީ ފައިދާއެވެ. ނަމަވެސް އަޅުގަނޑުމެންނަށް ކަންތައް ކުރެވޭގޮތުން ވަރަށް ބޮޑެތި މައްސަލަތައްވެސް ކުރިމަތިވެއެވެ. އެގޮތުން އެތަނެއްގެ ކުރިއެރުން ކަމުގައިވާ ރައްޔިތުންގެ އެއްބައިވަންތަކަން ނެތިގޮސް ބައިބައިވުން އުފެދޭގޮތަށް އެއްޖަމާއަތެއް އަނެއް ޖަމާއަތަކާ ހަސަދަވެރިކަން ބާއްވައިގެން މަސައްކަތް ކުރެވޭ ގިނަ ޖަމާއަތްތަކެއް އޮވެއްޖެނަމަ މުޅިންވެސް ލިބޭނީ ގެއްލުމެވެ. އެއާއި ހިލާފަށް ކޮންމެ ޖަމާއަތަކުންވެސް އެޖަމާއަތެއްގެ މަޤްޞަދުތައް ހާޞިލު ކުރުމަށް ،ހުރިހާ ޖަމާއަތެއްގެވެސް އެހީތެރިކަން ލިބޭނަމަ، އެރަށެއް އޮންނާނީ ކުރި އަރަ އަރައެވެ.
ދެން އިހަވަންދޫއަށް ބަލައިލާއިރު، މިހާރުވެސް އިހަވަންދޫގައި ގާތް ގަނޑަކަށް 6 ޖަމާއަތް އޮވެއެވެ. އެހެންނަމަވެސް ހިތާމައަކީ މިރަށުގައި އުފެދިފައި މިވާ ޖަމާއަތް ތަކުގެ ތެރެއިން އެކަށީގެންވާ ވަރަށް ހަރަކާތްތެރިވަނީ މަދު ޖަމާއަތެއްކަމެވެ. މިހާގިނަ ޖާމާއަތްތަކެއް ރަށުގައި އުފެދިފައިވާއިރު، ގިނަ ޖަމާއަތްތައް ފާހަގަވެގެން ދަނީ އަހަރު ނިމޭއިރު އަހަރުތެރެގައި ކުރެވުނު އެންމެ މުހިންމު ކަމަކަށް ޔައުމިއްޔާ ތަކުން ދައްކަނީ ކޮންމެވެސް ކުޅިވަރު މުބާރާތެއް ކުރިއަށް ގެންދެވުނު ކަމެވެ. ހަޤީގަތަކީ މިހުރިހާ ޖަމާއަތްތަކަކީވެސް ވަރަށް ގިނަ މަޤްޞަދުތަކެއް ހާޞިލުކުރުމަށް އުފައްދާފައިވާ ޖަމާއަތްތަކެއްކަމެވެ.
އެހެންކަމުން މިވަގުތު އަޅުގަނޑުމެން ބޭނުވަނީ ހަރަކާތްތެރި ގިނަ ޖަމާއަތްތަކެކެވެ. މިފުރުޞަތުގައި އަޅުގަނޑު މިރަށުގެ ހުރިހާ ޖަމާއަތްކުގެ ހިންގާ ކޮމިޓީއަށް ކުރިއަށްވުރެ ބޮޑަށް ހަރަކާތްތެރިވެ ރަށުގެ ފައިދާއަށް މަސައްކަތްތެރި ވުމަށް ގޮވާލަމެވެ. އަދި ކޮންމެ އަހަރަކު ހުރިހާ ޖަމާއަތަކުންވެސް ރަށުގެ ތަރައްގީއަށްޓަކައި ކުރެވިދާނެ ، އެޖަމާއަތެއްގެ ކޮންމެވެސް އެއްމަޤްޞަދު ހާސިލް ކުރުމަށް މަސައްކަތް ކުރުމަކީ ވަރަށް މުހިންމު ކަމެކެވެ. އޭރުން އަބަދުވެސް ރަށްދާނީ ކުރިއަރަމުންނެވެ.
ރަށުގެ ތަރައްޤީއަށްޓަކައި މަސައްކަތްކުރާ މަދަނީ ޖަމާއަތްތަކަށް ސަރުކާރުން އެހީތެރިވުމަކީ ވަރަށް މުހިންމުކަމެކެވެ. މިގޮތުން އިހަވަންދޫގައި އުފެދިފައި ހުރި ޖަމާއަތްތައް އެކަށީގެންވާ ގޮތަށް މަސައްކަތް ނުކުރެވޭ އެއް ސަބަބުކަމުގައި ބެލެވެނީ އިދާރީ މަސައްކަތްކުރާނެ ތަނެއް ނެތުންކަން ފާހަގަ ކުރެވެއެވެ. އެހެންކަމުން މިކަންތައް ހައްލުކުރުމަށް ކެރެވޭނެ ކަންތައް ބަލައި ސަރުކާރާއި ޖަމާއަތްތައް ގުޅިގެން، އެފިޔަވަޅެއް އެޅުމަކީ ވަރަށް މުހިންމު ކަމެކެވެ.
No comments:
Post a Comment