އަވަސްކުރައްވާ! އަޅުގަނޑުމެންގެ އަޚުންތަކެއް އެތިބީ އަޅުގަނޑުމެންގެ އެހީތެރިކަމަށް ބޭނުންވެފައި

އަޙްމަދު އާސިމް

ޝަހާދަތުގެ ދެކަލިމަކިޔާ ﷲ ގެ އެއްކައުވަންތަކަން ޤަބޫލުކުރުމާއެކު އަޅުގަނޑުމެން އެންމެން ވަނީ އަޚުންތަކެއްގެ ގޮތުގައި ލައްވަވާފައެވެ. މުސްލިމުންގެ މިސާލަކީ އެއް ހަށިގަނޑެއްގެ މިސާލެވެ. އެހަށިގަނޑުގެ އެންމެ ގުނަވަނަކަށް ވޭނެއް، ތަދެއް އިޙްސާސް ކުރެވޭނަމަ މުޅިހަށިގަނޑު އެކަމަށްޓަކައި ވޭންއިޙްސާސްކޮށް ހަދައެވެ. މިގޮތުން އެއްމުސްލިމަކަށް ލިބޭ ކޮންމެ ހިތާމައަކީ ދެންތިބި ހުރިހާ މުސްލިމު އަޚުންނަށް ލިބޭ ހިތާމައެއްކަން ދެނެ،ހުރިހާ މުސްލިމުންވެސް އެކަމުގައި ބައިވެރިވެއެވެ. މިއީ އެފަދަ ދަނޑިވަޅެކެވެ. އަޅުގަނޑުމެންގެ މުސްލިމު އަޚުން ކަމުގައިވާ އަވައްޓެރި ޕާކިސްތާނުގެ 20 މިލިޔަނަށްވުރެ މީހުން އެތިބީ ޙާލުގައި ޖެހިފައެވެ. މިވަގުތަކީ އަޅުގަނޑުމެން މުސްލިމުންގެ ހަޤީޤީ ބުރުސޫރަ ދައްކާލަންވީ ވަގުތެވެ. މިފަދަބަރަކާތްތެރި މައްސަރެއްގައި ﷲގެ މަގުގައި ހޭދަކޮށް އެއިލާހުގެ ރުއްސެމާއި ފުއްސެވުން އޭގެ އެންމެ މަތީ ހަރުފަތަށް ގެންދެވޭތޯ ބަލަމާ ހިނގާށެވެ.

ﷲ ތަޢާލާ އެކި ފަރާތްތަކަށް މުދާވެރިކަމާއި ތަނަވަސްކަން ދެއްވީ އެކިވަރަށް، އެ މީސްތަކުން އިމްތިޙާން ކުރެއްވުމުގެ މަޤުޞަދުގައެވެ. އެކަލާނގެ މުދާވެރި ކުރެއްވި ފަރާތްތަކުން، އެމުދަލުން، ނިކަމެތި ފަޤީރުންނަށް ދޭންޖެހޭ ހައްޤުތައް އަދާކުރޭތޯ ބެލުމަށެވެ. އަދި އެފަރާތްތަކުން ﷲ އަށް ޙަމްދުކޮށް ޙާލު އެކަލާނގެ މަގުގައި އެމުދާ ހޭދާކުރޭތޯ ބެއްލެވުމަށެވެ. ހަމަޔަޤީނުންވެސް މުދަލަކީ ﷲ ގެ މިލްކެކެވެ.އެކަލާނގެ ދެއްވި ނިޢުމަތެކެވެ. އަޅުގަނޑުމެންނާއި ޙަވާލުކުރެވިފައިވާ އަމާނާތެކެވެ. ކަންމިހެން ހުރުމާއެކު، ތަނަވަސްކަމުގެ އަޚުލުވެރީން މިކަން ދަންނަންޖެއެވެ. ޚާއްޞަކޮށް މިފަދަ ހިތާމަވެރި ދަނޑިވަޅުތަކުގައި އެބައިމީހުންގެ އަތްތަކާއި ހިތްތައް ދީލަތިކަމުން ޖަރީކުރަން ޖެހެއެވެ.

މިއުންމަތުގެ މާތް ނަބިއްޔާ މުހައްމަދު ރަސޫލުﷲ ޞައްލަﷲ އަލައިހި ވަސައްލަމަ އަޅުގަނޑުމެންނަށް އެކަން ވަނީ ޢަމަލީގޮތުން ދައްކަވައިދެއްވާފައިވެއެވެ. ރަމަޟާންމަހުގައި އެކަލޭގެ ފާނުގެ ދީލަތިކަން ހުންނަނީ ވައިރޯޅިއެއް ފެތުރިންގެދާފަދައިން ހުރިހާ އެންމެނަށް އެއިން ލިބޭފަދަ ގޮތަކަށް ކަމުގައި ޞައްޙަމަގުން ރިވާވެފައި ވެއެވެ. އަދި ރަމަޟާންމަހުގައި ކުރާ ހޭދައިގެ މާތްކަމާއި ބެހޭގޮތުން އެކަލޭގެފާނު ޙަދީޘް ކުރައްވާފައިވާ ހަދީޘެއްގެ މާނައިގައި ވެއެވެ.” ރޯދަވެރިޔަކަށް، ރޯދަވީއްލޭނެގޮތް ތަނަވަސްކޮށްދީފިމީހަކަށް، އެރޯދަވެރިޔާއަށް ދެއްވާވަރުގެ ޘަވާބު އޭނާއަށްވެސް ހުއްޓެވެ. އެއީ އެރޯދަވެރިޔާގެ ޘަވާބުން އެއްވެސް މިންވަރެއް އުނި ކުރެއްވުމެއް ނެތިއެވެ.”

އަތްމަތި ތަނަވަސް މުދާވެރިން ﷲ ގެ މަގުގައި ހޭދަކުރުން އިތުކުރަން ޖެހެއެވެ. އެހެނީ މުދަލާއި ފައިސާއަކީ އެއްވެސް ޙާލެއްގައި ތިމާ އެ ގިނަކޮށް ޚަޒާނާކުރުމަށް އިންސާނާއާ ޙަވާލު ކުރައްވާފައިވާ އެއްޗެއް ނޫނެވެ. އަދި ކީއްހެއްޔެވެ! އިންސާނާއަށް ވާޖިބުވެގެންވަނީ އެއިން ހޭދަކުރުމެވެ. ނިކަމެތިންނަށް އެފޯރުކޮށްދިނުމެވެ. ﷲ އަށް ޝުކުރުކުރުމެވެ.

ދެންފަހެ އިންސާނާ ﷲ ގެ ޙަޟްރަތުން މަދަދަށްއެދޭހާލު އެކަލާނގެ މަގުގައި ހޭދަކުރާ މުދަލަކީ ގެއްލިގެންދާ އެއްޗެއްނޫނެވެ. އެއީ ދުނިޔޭގައި އޭނާގެ މުދަލަށްވާ ޠާހިރުކަމެކެވެ. އަދި އާޚިރަތުގައި އޭނާއަށްވާ ބާއްޖަވެރިކަމެކެވެ. ކަންމިހެން ހުރުމާއެކު، އަޅުގަނޑުމެންވީ، ވެވުނު މިންވަރަކުން އެޚުންނަށް އެހީތެރިވެވޭތޯ ބަލާށެވެ. އޭރުން އަޅުގަނޑުމެންނަށް ﷲ ގެ ރުއްސެވުމާއި ޘަވާބު ލިބޭނެކަން ކަށަވަރެވެ.

މިފަދަ ދަނޑިވަޅެއްގައި އެހީތެރިވެވޭނެ ވަރަށް ގިނަ ގޮތްތައް އެބަހުއްޓެވެ.

1.ފައިސާއިން

2.ފޭރާމުން

3. ޓެންޓަކުން ( ބޯހިޔާކޮށްލެވޭނެ ގޮތެއް ހޯދާދިނުން)

4. ކާނާން

5. ފެން

މިއީ ހައްތާވެސް އެހީތެރިވެވިދާނެ ގޮތްގޮތެވެ. ނުވަތަ އެތަކެތި ދީގެންވެސް އެހިތެރިވެވިދާނެއެވެ. މިފަދަ އެހީއެއް ދެވެން ނެތް
މީހަކުނަމަ އެއަޚުން އެފަދަ ހާލުން ސަލާމަތް ކޮއްދެއްވުން އެދި ކުރާ ދުޢާއަކުން ވެސް އެހީތެރިވެވިދާނެއެވެ.

އަޅުގަނޑުގެ ދުޢާއަކީ، ޚާލުގައިޖެހިފައިވާ އަޅުގަނޑުމެންގެ އަވައްޓެރި ޕާކިސްތާނުގެ މުސްލިމު އަޚުންނާއި އުޚުތުން އެކަމުން ސަލާމަތްކުރައްވާ، އެފާވެރި ބާއްޖަވެރި ދިރިއުޅުމެއް ދެއްވުން. އާމީން!